Stiùireadh

‘S e seo an stiùireadh airson sgeama Taic Freumhan Coimhearsnachd 2025-27. Tha lethbhreac den stiùireadh seo ri fhaighinn ann am PDF an seo, is gheibhear cruthan eadar-dhealaichte den stiùireadh ma tha seo air iarraidh oirbh le bhith cur post-d gu tabhartas@gaidhlig.scot.

Tha an sgeama seo a’ dùnadh aig 3f air Dimàirt 28 Faoilleach 2025. Chaidh an duilleag seo ùrachadh mu dheireadh air 12 Samhain 2024.

Clàr

Mu dheidhinn na maoine
Riaghailtean airson Phròiseactan
Àrainneachd, Co-ionnanachd, Iomadachd & In-ghabhalachd agus Obair Cothromach
A’ cur iarrtas a-steach
Mar a nì sinn measadh air an iarrtas
Tuilleadh fiosrachaidh

Mu dheidhinn na Maoine

’S e Taic Freumhan Coimhearsnachd a’ phrìomh mhaoin aig Bòrd na Gàidhlig airson taic a chur ri buidhnean coimhearsnachd ann a bhith a’ lìbhrigeadh phròiseactan a bhios a’ cur air adhart cleachdadh is ionnsachadh na Gàidhlig aig ìre na coimhearsnachd. Am-bliadhna tha sinn a’ toirt a-steach sgeama Cholmcille còmhla ri Taic Freumhan Coimhearsnachd mar aon mhaoin gus taic a chumail ri Gàidhlig sa choimhearsnachd.

Bidh an sgeama a’ toirt cothrom seachad do bhuidhnean cur a-steach airson suas ri 2 bhliadhna de thaic-airgid, airson phròiseactan nas fhaide no feadhainn a tha a’ ruith gach bliadhna. ‘S e £200,000 am buidseat ris a bheil dùil airson an sgeama, ach tha seo ri dhearbhadh a rèir buidseat Bòrd na Gàidhlig 2025/26.

Tha co-fharpais air a bhith ann tro chuairtean eile den sgeama seo, agus mar sin tha sinn an dùil nach gabh taic a chumail ris a h-uile iarrtas freagarrach.

Bidh sùbailteachd san sgeama airson taic a chumail ri iomadh seòrsa pròiseict a tha ag amas air daoine a thoirt còmhla gus Gàidhlig a chleachdadh, ach tha sinn gu sònraichte airson taic a chumail ri:

Tachartasan Gàidhlig sa choimhearsnachd agaibh is air-loidhne
Pròiseactan is cothroman a tha a’ brosnachadh dhaoine òga a’ Ghàidhlig a chleachdadh còmhla
Pròiseactan a tha brosnachadh cleachdadh na Gàidhlig am measg theaghlaichean is eadar ginealaichean
Ionnsachadh inbhich Gàidhlig sa choimhearsnachd
Colmcille – Togail cheanglaichean eadar luchd-labhairt na Gàidhlig is Gaeilge

Anns an iarrtas agaibh, tha sinn airson ’s gum mìnich sibh mar a bhios am pròiseact agaibh a’ freagairt air aon no barrachd air aon de na h-amasan seo. Bu chòir dhuibh cuideachd a bhith mothachail air mar a bhios am pròiseact agaibh a’ cur ri Plana Corporra Bòrd na Gàidhlig 2023-28 agus ri Plana Nàiseanta na Gàidhlig 2023-28.

Ann a bhith a’ measadh an iarrtais agaibh, bidh sinn a’ coimhead gu sònraichte air:

Cho follaiseach ’s a tha am pròiseact agaibh a’ sealltainn gum bi e a’ brosnachadh cleachdadh na Gàidhlig sa choimhearsnachd agaibh is a’ coileanadh nan amasan sònraichte againn airson am-bliadhna
Comas am buidheann agaibh am pròiseact lìbhrigeadh gu soirbheachail
Neart nam planaichean agaibh gus buaidh a’ phròiseict agaibh a mheasadh
Luach an airgid a tha ga shealltainn leis a’ phròiseict

Mar a tha am buidheann a’ coileanadh dhleastanasan a thaobh na h-Àrainneachd, Co-ionnanachd is Obair Chothromach

Gheibhear stiùireadh nas mionaidiche air mar a thèid iarrtasan a mheasadh air làrach-lìn Bòrd na Gàidhlig.

Riaghailtean airson Phròiseactan

Cò dh’ fhaodas tagradh a chur a-steach?

Tha a’ mhaoin seo fosgailte do bhuidhnean treas-roinn stèidhichte (carthannasan no buidhnean saor-thoileach) a tha stèidhichte ann an Alba aig a bheil bun-reachd agus a tha airson pròiseact a lìbhrigeadh gus cleachdadh na Gàidhlig a bhrosnachadh am measg coimhearsnachd air ainmeachadh. Gheibhear eisimpleirean de phròiseactan a fhuair taic bho Taic Freumhan Coimhearsnachd a-cheana tron làrach-lìn GrantNav.

Chan fhaod buidhnean ach aon iarrtas a chur a-steach dhan chuairt seo den mhaoin.

Ma tha sibh air taic fhaighinn tro chuairt 2024-26 den sgeama (air a toirt seachad sa Ghearran/Màrt 2024), chan fhaod sibh iarrtas a dhèanamh ach a-mhàin ma tha am pròiseact maoinichte agaibh a’ crìochnachadh ann an 2025 agus am pròiseact ùr tòiseachadh ann an 2025 cuideachd. Ma tha ceistean sam bith agaibh a thaobh freagarrachd, cuiribh fios gu Bhòrd na Gàidhlig cho luath ’s a ghabhas.

Feumaidh cunntas-banca san RA a bhith aig a’ bhuidhinn agaibh cuideachd, fo ainm na buidhne, nuair a tha sibh a’ cur an iarrtais a-steach. Ma tha a’ bhuidheann agaibh an sàs ann am pròiseas cunntas banca ùr fhosgladh, chan urrainn dhan bhuidhinn agaibh iarrtas a chur a-steach.

Cò nach fhaod tagradh a chur a-steach?

Daoine fa-leth
Ùghdarrasan poblach no ionadail (is ALEOs)
Buidhnean coimeirsealta/airson prothaid
Buidhnean Com-pàirteach Lìbhrigidh Bòrd na Gàidhlig

Clàr-ama a’ Phròiseict

Bidh an sgeama a’ toirt taic do phròiseactan a thèid an tòiseachadh eadar 1 Giblean agus 31 Dùbhlachd 2024 agus a thèid crìochnachadh ro 31 Lùnastal 2026.

Thathar an dùil gun tèid an ath chuairt maoineachaidh a ruith eadar Samhain 2025 is Faoilleach 2026 airson pròiseactan 2026-28.

Dè tha cosgaisean a gheibh taic?

Faodaidh sibh suas ri £5,000 iarraidh ma tha pròiseact a’ maireachdainn suas ri 12 mìosan no suas ri £10,000 ma tha pròiseact a’ maireachdainn nas fhaide na 12 mìosan.

Faodaidh sibh iarraidh suas ri 80% de chosgaisean iomlan a’ phròiseict, fhad ’s a tha seo fon t-suim iomlan air ainmeachadh gu h-àrd.

Bu chòir dhuibh dèanamh cinnteach nach eil pàirt sam bith eile de bhuidseat a’ phròiseict air am maoineachadh tro sgeamaichean maoineachaidh eile, Maoin nan Ealan Gàidhlig air a ruith le Fèisean nan Gàidheal, Maoin nan Tabhartasan Beaga aig Seachdain na Gàidhlig no Buidhnean Com-pàirteach Lìbhrigidh Bhòrd na Gàidhlig.

Bu choir pròiseactan amas air teachd-a-steach iomchaidh fhaighinn bho chom-pàirtichean far a bheil seo comasach (m.e. cìsean airson chlasaichean Gàidhlig, airgead bho phàrantan airson turasan sgoile, tiocaidean airson chuirmean), agus is mathaid gun cuir sinn cumha air an taic-airgid againn gum bi sibh a’ togail ìre de dh’ airgead bho bhunan den leithid ma tha an t-iarrtas agaibh soirbheachail.

Bu chòir gach pròiseact a tha a’ pàigheadh tuarastalan no cìsean dhan fheadhainn a tha a’ lìbhrigeadh a’ phròiseict a bhith a’ pàigheadh co-dhiù Tuarastal Bith-beò fìor (a tha £12.60 san uair an-dràsta). Ma tha sibh a’ cleachdadh tuarastal gnìomhachais anns na figearan agaibh, nach cuir sibh fios a-steach dhan iarrtas air cò a shuidhich na h-ìrean agus ceangal ann gus am fiosrachadh a lorg.

Tha cosgaisean neo-ionmhasail/saor-thoileach ceadaichte mar phàirt de chosgaisean iomlan a’ phròiseict. Faodar taic neo-ionmhasail airson ùine air a thoirt seachad gu saor-thoileach a thuairmse le luach de cho-dhiù am Fìor Thuarastal Bith-beò no tuarastal gnìomhachais iomchaidh, ma tha sin ri fhaighinn, is bu chòir seo a bhith air ainmeachadh sa bhuidseat an dà chuid mar theachd-a-steach agus cosgaisean.

Cha bhi sinn a’ cur taic ri cosgaisean pròiseact ri linn:

Cosgaisean-tòiseachaidh no cosgaisean ruith leantainneach aig buidhnean
Cosgaisean ri linn cur air dòigh, frithealadh no pàirt a ghabhail sa Mhòd Nàiseanta Rìoghail no Mòdan Ionadail
Fèisean ionadail (a tha air am maoineachadh le Bòrd na Gàidhlig tro Fhèisean nan Gàidheal)
Siubhal air itealan (tha sinn a’ moladh gun tèid dòighean le nas lugha eimiseanan a thaghadh)
Cosgaisean uidheamachd thairis air £500 gu h-iomlan
Duaisean co-fharpaisean
Lìbhrigeadh curraicealam na sgoile
Seiseanan tràth-bhliadhnaichean

Ciamar a thèid sinn ar phàigheadh?

Ma tha an t-iarrtas agaibh soirbheachail, ma tha dùil agaibh gum bi am pròiseact crìochnachadh taobh a-staigh 12 mìosan, gheibh sibh 80% den tabhartas iomlan às dèidh dhuibh an t-aonta taic-airgid is aithisgean sam bith a tha a dhìth airson phròiseactan eile a chur a-steach, leis an 20% mu dheireadh air a phàigheadh às dèidh dhuibh aithisg dheireannach iomchaidh a thoirt seachad airson a’ phròiseict.

Airson phròiseactan a thathar an dùil a ruith airson còrr is 12 mìosan, gheibh sibh, sa chumantas, 40% den tabhartas iomlan às dèidh dhuibh an t-aonta taic-airgid is aithisgean sam bith a tha a dhìth airson phròiseactan eile a chur a-steach. Bidh suas ri 50% den tabhartas ri phàigheadh às dèidh dhuibh aithisg adhartais a chur a-steach letheach slighe tron chlàr-ama a bha an dùil airson a’ phròiseict, is an 10% mu dheireadh (ma tha e a dhìth) ri phàigheadh às dèidh dhuibh aithisg dheireannaich iomchaidh a thoirt seachad.

Bitheamh mothachail gu bheil gach pròiseact air am maoineachadh air stèidh rèidh, agus gum bi dleastanas oirbh taic-airgid Bòrd na Gàidhlig sam bith nach deach a chleachdadh air pròiseact tilleadh thugainn.

Ag aithneachadh taic

Mar bhuidheann phoblach, tha e cudromach dhuinn gu bheil fios aig a’ phoball air mar a tha sinn a’ cleachdadh ar cuid airgid, is mar sin tha e cudromach gu bheil sibh ag aithneachadh gun tug Bòrd na Gàidhlig taic-airgid dhan phròiseact agaibh (far a bheil sin iomchaidh). Ma tha an t-iarrtas agaibh soirbheachail, bidh dleastanas oirbh an taic-airgid againn aithneachadh ann an diofar dhòighean tron phròiseact is fios a thoirt seachad dhuinn sna h-aithisgean agaibh air mar a rinn sibh seo.

Airson tuilleadh fiosrachaidh, nach toir sibh sùil air an Stiùireadh Aithneachaidh is Stiùireadh Brannd air an làrach-lìn againn.

Sgrùdadh is measadh air a’ phròiseact

Ma tha an t-iarrtas agaibh soirbheachail, bidh agaibh ri sgrùdadh is measadh a dhèanamh air mar a thèid am pròiseact agaibh a lìbhrigeadh agus a’ bhuaidh aige a shealltainn sna h-aithisgean a thèid iarraidh oirbh.

Feumar aithisg dheireannach a chur a-steach airson gach pròiseact a thèid a mhaoineachadh, agus ma tha dùil gum bi am pròiseact agaibh a’ maireachdainn nas fhaide na 12 mìosan, feumaidh sibh aithisg adhartais a chur a-steach mu letheach slighe tro fhaid a’ phròiseict agaibh.

Aig a’ char as lugha, bidh sinn ag iarraidh oirbh clàradh cia mheud duine a tha a’ gabhail pàirt sa phròiseact agus faighneachd de chom-pàirtichean (no sampall de na chom-pàirtichean airson tachartasan/pròiseactan mòra) airson fios fhaighinn air beachdan aca air buaidh am pròiseact air an cleachdadh, ionnsachadh no beachd aca den Ghàidhlig.

Thèid iarraidh oirbh san fhoirm-iarrtais mar a bhios sibh an dùil sgrùdadh a dhèanamh air a’ phròiseas, dè na thargaidean a bhios sibh a’ cleachdadh gus measadh an robh am pròiseact soirbheachail is mar a bhios sibh a’ trusadh fiosrachaidh bho chom-pàirtichean.

Bidh e comasach dhuibh na h-aithisgean a chur a-steach tro phortal iarrtasan Fluxx aig https://bng.fluxx.io, agus bidh e comasach seo fhaicinn ma tha an t-iarrtas agaibh soirbheachail.

Àrainneachd, Co-ionnanachd, Iomadachd & In-ghabhalachd agus Obair Cothromach

Tha dleastanasan aig Bòrd na Gàidhlig gus cur air adhart deagh chleachdadh ann a bhith:

A’ lùghdachadh buaidh air an àrainneachd
A’ brosnachadh co-ionannachd chothroman do dhaoine le feart dìonta a rèir Achd Co-Ionannachd 2010
A’ brosnachadh chothroman do dhaoine òga a tha, no a tha air a bhith, fo chùram a rèir Achd na Cloinne is nan Daoine Òga (Alba) 2014

Bu mhath leinn gum bi na buidhnean is pròiseactan a tha a’ faighinn maoineachadh bhuainn cuideachd a’ cur ris na h-amasan seo, is bidh sinn ag iarraidh oirbh san fhoirm-iarrtais mar a tha sibh an dùil gum bi am pròiseact agaibh a’ dèanamh seo.

Airson tuilleadh fiosrachaidh, nach leugh sibh fiosrachadh tro na ceanglaichean gu h-ìosal:

Obair Chothromach

Feumaidh buidhnean a tha a’ faighinn maoineachadh poblach ann an Alba cumail ri poileasaidh Obair Chothromach aig Riaghaltas na h-Alba, agus mar sin feumaidh iad:

Co-dhiù am fìor Thuarastal Beò a phàigheadh; agus
Dòighean iomchaidh airson guth luchd-obrach èifeachdach, leithid aithneachadh aonaidhean-ciùird, a chruthachadh

Thèid iarraidh oirbh mar phàirt den tagradh agus an aithris agaibh dearbhadh gu bheil sibh a’ cumail ris a’ phoileasaidh agus fianais a thoirt seachad gun do rinn sibh sin.

Tha tuilleadh stiùireadh air mar a tha sinne aig Bòrd na Gàidhlig a’ cur an gnìomh poileasaidh Obair Cothromach ri fhaighinn an seo, is tha stiùireadh bho Riaghaltas na h-Alba air am poileasaidh ri fhaighinn an seo.

A’ cur iarrtas a-steach

Bu chòir dhuibh iarrtas a chur a-steach tro phortal iarrtasan Fluxx aig bng.fluxx.io. Faodaidh sibh cunntas a chruthachadh saor ’s an-asgaidh air an làraich-lìn sin is tha e comasach an t-adhartas agaibh leis an iarrtas a shàbhaladh fhad ‘s a tha sibh ag obair air. Faodaidh sibh gach faidhle-taic a chur a-steach tron phortal.

Dùnaidh portal nan iarrtasan aig 3f air Dimàirt 28 Faoilleach 2025 agus cha bhi e comasach iarrtas a chur a-steach às dèidh a’ chinn-uidhe sin ach ma fhuaras cead ro-làimh bho oifigearan Bhòrd na Gàidhlig.

Tha taic mionaideach ri fhaighinn air an fhiosrachadh a tha sinn a’ sireadh bho gach ceist.

Ma tha duilgheadasan sam bith agaibh leis a’ phortal, ma tha sibh airson na faidhlichean iarrtais fhaighinn ann an cruth eadar-dhealaichte, no ma tha ceistean sam bith agaibh a thaobh an iarrtais nach cuir sibh post-d thugainn aig tabhartas@gaidhlig.scot.

Nuair a tha sibh a’ cur an iarrtais a-steach, ach a-mhàin ma tha sibh a’ cur iarrtas a-steach às leth sgoile, feumaidh sibh na faidhlichean-taic riatanach a leanas a chur còmhla ris:

Riatanach

Bonn-stèidh no Meòrachan agus Artaigilean Companaidh
Na cunntasan bliadhnail mu dheireadh no, ma ‘s e buidheann air stèidheachadh o chionn goirid a th’ annaibh, litir bhon bhanca a’ dearbhadh gu bheil sibh air cunntas fhosgladh a bharrachd air aithrisean banca sam bith a tha rim faighinn
Poileasaidh Dìon Chloinne no Barantachaidh (ma tha clann no inbhich so-leònte an sàs sa phròiseact)
Liosta de Bhuill a’ Bhùird no Comataidh (ach a-mhàin airson companaidhean clàraichte)

Air am moladh (ma tha iad rim faighinn)

An Aithisg Bhliadhnail mu dheireadh
Poileasaidh Gàidhlig
Poileasaidh co-ionannachd chothroman no Poileasaidh co-ionnanachd, iomadachd is in-ghabhaltachd
Poileasaidh no aithris àrainneachd

Mur eil na sgrìobhainnean a bharrachd a tha a dhìth air an cur a-steach còmhla ri iarrtas (ach a-mhàin mas e iarrtas as leth sgoil a th’ ann ), bidh an t-iarrtas neo-cheadaichte agus cha tèid a mheasadh.

Mar a nì sinn measadh air an iarrtas

Gheibh sibh post-d fèin-obrachail bhon phortal Fluxx a’ dearbhadh gun d’ fhuair sinn an t-iarrtas agaibh. Mur eil sibh air seo fhaighinn, dèanaibh cinnteach gu bheil sibh air an t-iarrtas agaibh a chur a-steach is nach eil sibh dìreach air a shàbhaladh.

Thèid sgrùdadh a dhèanamh air iarrtasan nuair a thig iad a-steach le oifigearan Bhòrd na Gàidhlig gus dearbhadh gu bheil iad a’ leantainn riaghailtean na maoine agus gu bheil iad a’ toirt seachad an fhiosrachaidh a tha a dhìth. Ma thathar den bheachd nach eil an t-iarrtas agaibh ceadaichte, thèid iarraidh oirbh seo a chur ceart. Mur eil an t-iarrtas agaibh gu tur a’ leantainn riaghailtean na maoine aig 10m air Diluain 10 Gearran 2025 dh’fhaodte gun tèid an t-iarrtas agaibh a dhiùltadh gun mheasadh.

Thèid gach iarrtas ceadaichte a mheasadh le pannal de dh’ oifigearan aig Bòrd na Gàidhlig a rèir an stiùireadh-measaidh, agus cuiridh iad molaidhean do Sgioba-stiùiridh Bhòrd na Gàidhlig a nì an co-dhùnadh air na h-iarrtasan.

Dh’fhaodadh gun iarr Bòrd na Gàidhlig tuilleadh fiosrachaidh no mìneachadh air fiosrachadh mu dheidhinn a’ phròiseict mar phàirt den phròiseas measaidh. Mur an tèid am fiosrachadh seo a thoirt seachad taobh a-staigh 5 làithean-obrach, tha sinn a’ glèidheadh na còrach gum faod sinn an t-iarrtas agad a dhiùltadh.

Tha sinn an dùil gun tèid innse dhuibh mu cho-dhùnaidhean air an iarrtas agaibh le phost-d sa chiad leth sa Mhàirt 2025.

Ma thèid taic a thabhann dhuibh, thèid litir taic-airgid a chur thugaibh tro Docusign dhan neach-sgrìobhaidh ainmichte agaibh (no luchd-sgrìobhaidh ma tha sibh nar buidheann le luchd-obrach agus gum feum sibh Dearbhadh Obrach Chothromaich a lìonadh). Bidh suas ri 30 latha agaibh gus gabhail ris an tairgse (is cumhaichean) no thèid an tairgse taic-airgid a thoirt air ais.

Mur eil sibh riaraichte le co-dhùnadh air an iarrtas agaibh, ged nach eil pròiseas ath-thagradh againn faodaidh tu gearain a chur a-steach ma tha thu den bheach nach deach dèiligeadh ris an iarrtas agad a-rèir an stiùireadh ‘sa is an stiùireadh-measaidh. Airson tuilleadh fiosrachaidh, tha ar modhan gus dèiligeadh ri ghearanan ri fhaighinn an seo.

Tuilleadh fiosrachaidh

Airson tuilleadh fiosrachaidh mun mhaoin seo, tadhail air làrach-lìn Bhòrd na Gàidhlig no cuiribh fios gu tabhartas@gaidhlig.scot.

Faodaidh tu cuideachd sùil a thoirt air freagairtean ri cheistean cumanta mu dheidhinn a’ mhaoineachaidh againn air an làraich-lìn againn.

Gheibhear fiosrachadh mu phrìobhaideachd a thaobh ar sgeamaichean maoineachaidh air an làraich-lìn againn.

Gheibhear cruthan eadar-dhealaichte den stiùireadh seo is de dh’fhoirmichean-iarrtas ma tha sibh ag iarraidh agus dh’ fhaodadh gun tèid iad air fhoillseachadh aig: https://www.gaidhlig.scot/gd/maoineachaidh/cothroman-maoineachaidh/taic-freumhan-coimhearsnachd/